ازاي اروح منطقة سقارة الاثرية وايه الحاجات اللي ازورها هناك واسعار التذاكر؟

___ غرائب :

ازاي تروح منطقة سقارة الاثرية وايه الحاجات اللي تزورها هناك واسعار التذاكر؟ 🤞🏼

اول حاجه منطقة سقارة موجودة في البدرشين تبع محافظة الجيزة و المواصلات العامة ليها موجودة في موقف المريوطية وبتنزل عن مدخل البلد ومن هناك تاخد توكتوك لحد البوابات 

او تاخد اوبر بردو وهيوصلك لحد البوابات، او تشوف حد صاحبكم معاه عربية وتروحوا هناك سوا 🤞🏼

اسعار التذاكر هناك

 للطلبة المصريين 5 جنيه و 20 جنيه لو مش طالب وكل مكان في سقارة ليه تذكرة مخصصة

يعني فيه تذكرة لمنطقة الهرم وفيه تذكرة لمنطقة السرابيوم ومروركا وتذكرة للهرم والمجمع الجنائزي 

طب ايه الاماكن اللي بتزوها في سقارة؟

1- هرم الملك اوناس وده هرم جميل جدا وبتدخل جوه الهرم وتشوف النقوش على الجدىان بتاعت المقرة

2- هرم زوسر المدرج اللي تم افتتاحه بعد 14 سنة كانوا بيرمموه 

3- منطقة بهو الاعمدة ودي اللي اتصور عندها فيلم الاصليين 

4- معبد السرابيوم وده موجود فيه 7 توابيت للعجل أبيس وده عبارة عن سراديب تحت الارض منحوتة وكان بيستخدمها الرهبان المسيحيين علشان يستخبوا فيها من اضطهاد الرومان 

5- مقبرة مروركا ودي عبارة عن 32 غرفة مرسوم على جدرانها الحياة اليومية للمصري القديم من اول نقل المؤن لحد رحلات الحج بتاعتهم

 

6- مقبرة الاخوين

 

7- قاعة التهيئة المرئية ودي بيكون فيها فيلم وثائقي عن منطقة سقارة

8- متحف ايمحتب وده موحود فيه واحدة من اقدم المومياوات اللي تم اكتشافها وحاجات تانية كتير 

طيب ايه لازم تاخدوا بالكم منه؟

1- المسافات في منطقة سقارة كبيرة يعني تعمل حسابك لو هتروح لوحدك هتمشي شوية حلوين 

2- حاول تشوف ناس صحابك علشان يكون معاكم حد يشرحلكم كل مكان في المنطقة هناك لان حقيقي فيه كمية تفاصيل تخليك هتتجنن!

3- طبعا مش محتاج اقول ان لبسك يكون رياضي ولابس كوتشي مريح ومعاك ماية 

4- عند متحق ايمحتب فيه حمامات ونظيفة جداً

 

5- خد معاك ناس بتعرف تصور 😂🙄

هرم زوسر المدرج يعتبر اقدم بناء حجري في التاريخ كله، ف حقيقي لازم اي حد بيفكر يخرج في مكان جديد يروح المكان ده 

دلوقتي متنساش تشارك الموضوع مع اصحابك اللي هيكونوا معاك وقولهم مستنيين ايه؟ يلا نروح سقارة