أهم النقاط في تأسيس الكهرباء 10 حجات مهمة جدا خد بالك منها

عشر حاجات سريعه خد بالك منها وانت بتاسس الكهرباء لوحدتك 

1- مخرج كهرباء خارج شبابيك الحمام و المطبخ للشفاطات و اعمله بمفتاح افضل مش بفيشه (عشان السلك مايظهرش ) .

2- اعمل النجفه علي مفتاحيين .

3- لو مساحه الحمام عندك كويسه مش صغيره ماتحطش مصدر اضاءه فوق مرايه الحوض و اعمل مخرجين كهرباء للاضاءه يمين و شمال المرايه علي ارتفاع منتصف المرايه ( و الافضل تكون مستقر علي شكل و حجم المرايه عشان تظبط الكهرباء ليها ) .

4- مش لازم تعمل علبه مفتاح التكييف واقفه ( فيه اشكال احلي و هي نايمه زيها زي علبه المفاتيح و البرايز العاديه و هتمشي مع الديكور العام اللي انت عامله ) .

5- بعد ما الكهربائي يخلص صور الشغل كله و هو لسه خراطيم عالحيطه عشان بعد كده لما تعلق براويز او هتخرم فالحيطه لاي سبب ماتخرمش في اي خراطيم او اسلاك فالحائط .

6- بقدر الامكان حاول ماتعملش بواطات الكهرباء ( اللي هي العلبه اللي بنلاقيها عاليه فالحيطه و جواها اسلاك و ليها غطا بلاستيك ) عشان شكلها وحش .

7- خلي برايز المطبخ بسمك 4 مم عشان تستحمل احمال اجهزه المطبخ .

8- اكد علي الكهربائي انه يخلي ارتفاعات البرايز كلها موحده و ارتفاعات المفاتيح بردو و خليه يرسمهالك كمثال عالحيطه عشان انت تبقي متخيل ارتفاعها .

9- لو هتعمل فلتر اسفل حوض المطبخ خليه يعملك فيشه فمكان الفلتر ( و كذلك الغسالات خليه يعمل الفيشه بتاعتها تحت رخامه المطبخ و يعملَها مفتاح فوق للتحكم فيها ) و ماتنساش مخرج كهرباء اسبوتات خشب المطبخ .

10- الفيش اللي بجانب السرير وعند الكومودينو خلي ارتفاعها اعلي من الفيش العاديه عشان مايجيش الكومود يداريها و ماتستفدش بيها .