أرخص تكاليف السفر لآداء العمرة في مصر، تجربتي
ناس كتير سالتنى ازاى عملت العمره وان ازاى العمره ممكن تكون ب ١١ الف جنيه واقل لو فى عروض طيران بالتاشيره والفندق والمواصلات.. فقولت اعمل موضوع كامل فيه التفاصيل كلها للى محتاج. يعمل عمره فى نقط بسيطه ..
2- روحت عن طريق شركة طيران فلاى ناس ودى الشركه الوحيده اللى بتعملها من القاهره لجده للقاهره .. اما الطيران السعودى فلازم تزود فى تذكرتك دوله تالته (زى الاردن او لبنان عشان بلدين سهلين) وتنزل فى جده اكنها ترانزيت اربع ايام .. وبعد كده بتيجى القاهره من غير ما تروح الدوله التالته ..
ف باختصار فلاى ناس اسهل واضمن بدون تعقيدات ..
3- بتخش على موقع فلاى ناس وتحجز تذكره رايح جاى ولازم تراعى فرق ال ٩٦ ساعه بين رحلة الذهاب والرجوع .. تكون مظبوطه او اقل بس مش اكتر عشان مترجعش من المطار ..
4- بعد الحجز بتخش على إدارة الحجز وتختار عمل تاشيرة المرور بالباسبور وصوره بخلفيه بيضاء ..
الخطوه التالته والرابعه انا اختصرتهم واخترت شخص بثق فى شغله عملهم ليا ونصحنى بارخص سعر على طول .
واللى محتاج رقمه يتواصل معايا وابعتهوله .. بيعمل الخطوتين دول وبتحوله الفلوس عن طريق انستاباى.
5- بالنسبه للناس اللى على قوة احتياط الجيش فيعمل تصريح سفر وده عملته اونلاين ب ٧٥ جنيه وجالى تانى يوم ..
6- كان اختيار الفندق .. وده جبته من بوكنج وبقيت اشوف الفندق واشوف مسافته من الحرم او من باب الملك فهد رقم ٧٩ من جوجل مابس .. اشهر باب هناك وهو الوحيد اللى تقدر تخش منه للكعبه على طول ..
واللى عاوز رقم حد يساعده على حسب ميزانيته ممكن ابعتله رقم حد..
عامة فى فنادق بتحاسبك بالسرير والفنادق البعيده ليها عربيه للحرم والقريبه بتروح ليها مشى.. فمتخفش اطلاقا من حوار الفنادق ده لانهم كتير فى مكه ..
7- لو عاوز تزور المدينه ( عشان تزور مسجد الرسول ) فخصصلها يوم .. وتخلى الذهاب لجده مثلا ( ساعتها هتحرم من المطار ) والرجوع من المدينه .
لان المسافه من مكه للمدينه ٧ ساعات اتوبيس و ٤ ساعات ونص بالعربيه الملاكى .. فحرام تروح وترجع فى نفس اليوم..
الاصعب من زيارة المدينه هو تصريح الروضه الشريفه من على تطبيق نسك لان الروضه زحمه والتصريحات مش بتفتح بسهوله والرجاله بالنهار والسيدات بالليل .. وانت مقيد بيوم او اتنين بالكتير لازم تحجزها فيهم ..
8- بالنسبه لنقطة المواصلات من مطار جده لمكه او لفندقك على طول فى ٣ حاجات ..
اول حاجه ممكن تركب قطار الحرمين بحوالى ٣٥ ريال للفرد ( ٣٥٠ جنيه) وبعد ما تنزل منه بتركب اتوبيس مجانى ( حافلات مكه) للحرم .. وبعدها بتشوف فندقك فين وتركبله تاكسى او تروحه مشى ..
تانى حاجه بقى ممكن تتفق مع تلت اشخاص او تجمع تلاته معاك وتاخد تاكسى من المطار على طول وكل واحد يدفع ٥٠ ريال ويوديك لحد الفندق وده اللى عملته السنه اللى فاتت ..
تالت حاجه بقى عشان البهدله انا اتعاملت مع شخصيه محترمه جدا جه اخدنى من المطار للفندق ب ١٢٠ ريال انا وزوجتى .. وبعد ما خلصت العمره هو اللى ودانى المطار ..
بالنسبه بقى للمدينه لو عاوز تروح من مكه او العكس.. روحتها فى عمرتى السابقه ب ٥٠ ريال للفرد فى عربيه بتحمل ورجعت بنفس المبلغ فى نفس اليوم من قصاد الحرم ..
9- بالنسبه للاكل والشرب بصراحه اغلى من مصر وخصوصا بعد تعويم العمله المصريه ..
فالافضل تاخد علب فول وعلب تونه وحبة فاكهه وشويه مخبوزات .. اخرك هتجيب عيش بس من هناك ( كلهم على بعض خمس ايام)
ولو عاوز تاكل فمعظم الوجبات للفرد ب ٢٠ ريال وكلها فراخ (فراخ بروست زى كنتاكى كده او مسحب زى البانيه مربعات صغيره كده )
10- اخر نقطه بقى الريالات بتجبها من اى بنك انت تابع ليه .. بالسعر الرسمى بالباسبور والتذكره والتاشيره وجبت كمان وصل الدفع بتاع التذكره لشركة السياحه كاثبات دفع .. واخدت ١٠٠٠ ريال كان كافيين جدا الحمد لله
دى نتيجة خبرتى فى المرتين اللى روحتهم فلو حد محتاج حاجه يسالنى وانا تحت امره ..
لو وصلت للاخر .. فاعمل شير وفيد غيرك .. مفيش احلى من زيارة بيت الله الحرام
0 التعليقات:
إرسال تعليق