نصائح قبل زيارة أهرامات الجيزة
لو عايز تزور الأهرامات أول مرة ومعاك عيلتك ومش عاوز نصب وبهدلة ووجع دماغ وحد ينصب عليك أو يشتغلك.
خد النصائح او الخلاصه في هذه النقاط:
1- هتطلع بعربيتك عادى من مدخل المينا هاوس.
2- بعد الكمين هتلاقى ناس بتشاورلك و تقولك الهرم مقفول ولا اكنك شايفهم و كمل و اطلع.
3- ادخل عادى و اركن و اقطع تذاكر ليك و لاسرتك و للعربية.
4- هما هيعدوا على رجلهم و انت هتعدى بالعربية من التفتيش.
5- نبه علهم بعد البوابة مايتكلموش مع حد لان الصيادين فى الحتة دى كتير لحد لما تقابلهم.
6- هتطلع عن الهرم الكبير فى باركنج كبير اركن و انزل لف براحتك.
7- اى حد يعرض عليك حاجة قوله شكرا و هو هياخد بعضه و يمشى من اول مرة و احيانا من تانى مرة لان شرطة السياحة نافخاهم.
8- ان حبيت تدخل جوة مبنى الهرم نفسه بتقطع تذكرة من و انت على الباب برة و انصحك بالهرم الوسطانى سعر التذكرة حنين و الممرات جوة الهرم مش كبيرة زى الهرم الكبير.
9- اى حد يقولك لفة بالجمل هنوريك ال٩ اهرامات هنوريك النجوم فى عز الضهر نصيحة بلاش طلاما انت ماتعرفش حد هناك.
10- هتاخد العربية و تطلع على الهرم الوسطانى فى هناك باركينج برضه اركن و انزل و لف براحتك.
11- حاول تسيب العربية و تمشى اكنك طالع الهضبة فى مقبرة بتكون على اليمين ورا الصخور و دخولها مجانا و محتفظة بالرسومات و بالالوان بتاعتها.
12- خد عربيتك و كمل على الطريق لفوق و اطلع البانوراما و دى هضبة خلف الاهرامات فيو التصوير هناك حلو و هيعجبك.
13- بعد كدة انزل تحت خالص عند بوابة ابو الهول و اطلع على رجلك ادخل معبد ابو الهول و اطلع اتصور جمبه.
14- اى حد يقولك هات اصورك قوله شكرا هياخد منك فلوس حتى و هو بيصورك بتليفونك.
15- خلى معاك ٥٠ جنية ٥ دول علشان الامناء او علبة سجاير توزع منها و دول بتوع امن الباركينج و البوابات و هتلاقى شكلهم غلابة جدا.
16- خد معاكم مية ساقعة كتير و طواقى للراس خصوصا للاطفال و خليهم يشربوا على قد مايقدروا
و ان شاء الله تكون رحلة سعيدة و تنبسطوا بيها.
0 التعليقات:
إرسال تعليق