10 معلومات غريبة عن سر شارع النبي دانيال

10 حاجات مانعرفهاش عن سر شارع " النبي دانيال"

1- هو شارع من أقدم واطول شوارع الاسكندرية هو واحد من الشارعين الرئيسين في تخطيط الاسكندرية القديمة. 

2 - الشارع بيمتد حديثا من محطة الرمل ل محطة مصر ...كان معروف في العصر اليوناني باسم " الكاردو دي كومناس " وكان للشارع بوابتين... بوابة الشمال " بوابة القمر "... وبوابة الجنوب "بوابة الشمس ". 

ازاي اروح شارع النبى دانيال

الشارع له مدخلين اولهم عند محطة قطار الإسكندرية الرئيسية والمشهورة بإسم (محطة مصر)، اول ما تطلع من باب المحطه اتجه يمينا سيرا على الأقدام، في النهاية ستجد سور، اتجه يسارا سيكون شارع النبى دانيال على يمينك. 

المدخل الثاني من محطة الرمل، وهي اشهر منطقة في مدينة الإسكندرية. 

3- الشارع اتعرف بعد كدة بأسم النبي " دانيال " وده نسبة لمقام المسجد الموجود في أول الشارع من محطة مصر. 

من هو النبي دانيال في الإسلام

4- لكن من هو النبي "دانيال " ....النبي دانيال هو أحد انبياء بني اسرائيل اللي بيرجع وجوده تقربيا للقرن ال 6 ق.م ويقال انه جاء للاسكندرية ودفن في المقام اللي موجود تحت المسجد بحوالي 5 مترا ....لكن الكلام ده مش صح لأن النبي دانيال مات قبل بناء الاسكندرية بحوالي 3 قرون. 

5- طيب الضريح اللي موجود ده بتاع مين والشارع اتسمي كدة ليه اصلا؟! ....الضريح ده لأحد شيوخ المذهب الشافعي هو الشيخ " محمد "دانيال " الموصلي " اللي جيه للاسكندرية في القرن ال 8 وعاش فيها وبدا يدرس فيها علوم الفقه وبعد كدة اتوفي وادفن في المسجد ..ومن هنا جيه الخلط بين الاسمين وتسمية الشارع. 

6- ارتبطت بالشارع كتير من القصص والاشاعات والروايات واشهرهم العروسة اللي كانت ماشية مع خطيبها وأرض الشارع اتشقت وبلعتها ومالقيوهاش ...وانتشر ان السبب في ده هو لعنة الاسكندر ومقبرته.

7- لكن ده مش صح والسبب في ان الارض انشقت او غارت هو ان فيه "سراديب" موجود تحت الشارع. 

سرداب شارع النبي دانيال 

8- ايوة سراديب ....اللي جاي من محطة مصر وهو داخل الشارع علي ايده الشمال هيلاقي مسجد تاني اسمه مسجد " عبد الرازق الوفائي " شيخ المتصوفين ...جنب المسجد فيه ارض فاضية "بنشوفها واحنا ماشين " عبارة عن حفرة كبيرة جدا وفيها عمود رخام اهو ده واحد من السراديب اللي اكتشفت والسراديب دي ممتدة بطول الشارع

9- السراديب دي كانت عبارة عن انفاق كبيرة بترجع للعصر الروماني كانت متصلة ببعضها وكانت مخصصة لهروب الامبراطور لو حصل ثورات من اهل الاسكندرية وبعضها كان موصل لغاية البحر ...

المقريزي قال عن الانفاق دي في وصفها " يسير فيها الفارس ممتطيا جواده و رافع سيفه " وان ارتفاعها حوالي 3 متر

10- نركز مع بعض شوية بقي....الانفاق دي ارتفاعها حوالي 3 متر بعد العمق ده بحوالي 6 متر تقريبا فيها بقايا صهاريج للمياه وبعض اجزاء للمقبرة الملكية اللي بتمد من تقاطع شارع فؤاد مع النبي دانيال لغاية كوم الدكة يعني احنا بنتكلم في عمق حوالي 12 متر وأكتر وهو ده اللي مخلي الارض في المنطقة دي رخوة وتربتها متخلخلة وعلشان كدة الارض بتغور كل فترة

في الاخر....أهمية شارع النبي دانيال مش بسبب انه أقدم شوارع الاسكندرية ولا انه عايم علي بحر من الاثار اللي منها أكتشف ومنها لأ....الأهمية اكبر واعمق من كدة بكتير ..اهميته انه باقي وصامد وقادر يجمع في قلبه حضارات واديان اتعاشت وبتتعاش ...حتي بايعين الكتب اختاروا النبي دانيال مكان لهم وكأنهم بيصدقوا علي انه مش مجرد شارع ...ده تاريخ بيكتب نفسه كله يوم....<3

ملحوظة: 

*الصورة الاولي لمسجد النبي دانيال والصورتين التانية والتالتة للسرداب المكتشف.. 

*الاسكندرية اللي احنا عايشين فيها مدينة من أصل 3 مدن موجدين تحت سطح الارض والبحر.