مهندس مصري بيشغل العربيات بالهيدروجين بدل البنزين

 مهندس مصري من إسكندرية وصاحب ورشة ميكانيكا

 اسمه "هشام أحمد منصور" نفذ فكرة جديدة ومختلفة بالجهود الذاتية.. قدر يستخلص الهيدروجين من الماء ويستخدمه كوقود بدل البنزين والغاز الطبيعي!.. 

"هشام" بيقول في حوار له مع قناة "العربية" إن الفكرة جاتله لما سمع خطاب للرئيس "عبدالفتاح السيسي" بيدعو فيه الناس إنهم يحولوا عربياتهم للغاز الطبيعي بدل الوقود عشان توفير المشتقات البترولية ولإن ده بيمنع التلوث وبيحافظ على البيئة!.. دي كانت البداية اللي فتحت الطريق لـ "هشام" يبدأ يفكر في حل من خلال مهنته.. 

جهاز يستخلص الهيدروجين من الماء

بعد فترة تجريب قدر يوصل لتنفيذ جهاز بيستخلص الهيدروجين من كمية مياه حوالي 570 مللي والهيدروجين ده بيحرك العربية لمسافة 500 كيلومتر!.. قيمة الجهاز بتتراوح من 2000 لـ 4000 جنيه حسب الإنتاج وموديل العربية وبينتج كمية من الهيدروجين اللي بتناسب سعة العربية والمحرك بتاعها..

"هشام" بيقول كمان إن الجهاز مزود بقربة مياه، وبينتج من 8 لـ 12 لتر من الهيدروجين في الدقيقة وهو غاز أخضر مش بيضر البيئة، ولا بيلوثها، ولا بينتج انبعاثات.. "هشام" اشترك مع مجموعة من المهندسين في تحديد الكمية المناسبة لسعة كل محرك وعملوا تجربة عملية لعربية خلوها تمشي من إسكندرية لـ مرسى مطروح في مسافة حوالي 300 كيلو والعربية المفروض هتحتاج لـ 30 لتر بنزين لكن لما استخدموا الهيدروجين المستخلص من الجهاز العربية استهلكت 13 لتر بنزين بس عشان تكمل الرحلة!.. 

"هشام أحمد منصور" مواطن مصري حب يساهم باللي يقدر عليه في توجيه سمع الرئيس بيقول للناس عنه إنه هيفيد الدولة.. ولإنه بيثق في رئيسه فقفل على نفسه وصمم ونفذ حاجة تساعد في التوجه ده ونجح فيها..

المصدر :ON Tv