ازاى تاخد فيزا شنغن؟
تعالوا نتعرف اكتر عن الفيزا والشروط والمتطلبات الخاصه بيها من خلال خبرتى ل ١٢ سنه 😍
💚💚💚💚💚💚💚💚💚💚💚💚💚
ايه هى فيزا شنغن؟
فيزا شنغن هى عباره عن فيزا مجمعه ل 27 دوله من دول الاتحاد الاوروبى ... بمجرد ماتاخدها مسموحلك تدخل الدول الباقيه .. ودى مهمه جدا للناس اللى بتزور اكتر من دوله فى الرحله الواحده ولكن مع العلم آنك لازم تخدها من الدوله اللى هاتكون الوجه الرئيسيه و الاطول فى مده الاقامه بيها اثناء رحلتك.
💜💜💜💜💜💜💜💜💜💜💜💜💜
طيب ايه الدول بمنطقه الشنغن؟؟
إسبانيا، البرتغال، فرنسا، إيطاليا، ألمانيا، النمسا، سويسرا، إيسلندا ، الدانمارك، لوكسمبورغ، هولندا، بلجيكا، مالطا وليختنشتاين و استونيا، ولاتفيا، وليتوانيا وجمهورية التشيك، والمجر ، كرواتيا، وبولندا وسلوفاكيا، وسلوفينيا , اليونان , السويد و فلنندا والنرويج. وفى دول تانى داخل الاتحاد الاوربى ولكن خارج منطقه الشنغن زى رومانيا ، ليها الفيزا الخاصه بيها ولكن بتسمحلك انك تدخل بفيزا الشنغن.
💙💙💙💙💙💙💙💙💙💙
هانجهز ورقنا ازاى وايه اللى مطلوب مننا عشان نقدم على الفيزا؟
فى اوراق اساسيه بتبقى مطلوبه فى اى سفاره من سفارات دول الشنغن وفى اوراق بتختلف من سفاره لسفاره ... بس خلينا نتكلم على الاساسيات.
1. حجز طيران Air Ticket (Itinerary)
2. حجز فندق Hotel booking
3. خطاب اتش ار HR letter من المكان اللى بتشتغل فيه
4. كشف حساب بنكى Bank Statement
5. تامين طبى Travel Insurance
6. صور شخصيه Personal Photos
7. باسبور سارى وصوره منه Valid Passport
8. ابليكيشن السفاره Visa Application
9. شهاده التحركات movement Cert.
10. تعهد فى حاله دخول دول معينه قبل الحصول على فيزا شنغن.
🧡🧡🧡🧡🧡🧡🧡🧡🧡🧡🧡🧡🧡🧡
خلينا نتكلم عن كل حاجه فى الاوراق المطلوب بتفاصيل شويه:
❤️ حجز طيران Air Ticket (Itinerary)
مطلوب منك حجز طيران مبدئي ... تقدر تعملها اونلاين بحجر Refundable يعنى قابل انك تلغيه وتاخد فلوسك تانى او عن طريق اى شركه سياحه/طيران ممكن تعملهولك بسهوله.
لازم تراعى التواريخ الطيران انها تكون متوافقه مع كل الحجوزات والورق التانى اللى هتقدمه
🔅🔅🔅🔅🔅🔅🔅🔅🔅🔅🔅🔅🔅
❤️حجز فندق Hotel booking
كل سفارات شنغن بطلب حجز فندق وده سهل قوى انك تعمله .. ادخل على موقع بوكينج Booking واعمل حجز مبدءى قابل للالغاء Free cancelation بتواريخ الوصول والمغادره ولازم يبقى متطابق مع مواعيد حجز تيكيت الطيران والمده اللى انت طالبها للفيزا فى الابليكيشن. دى نقطه مهمه قوى. اى خلل فى التواريخ وانها مش متطابقه مع بعضها فى الورق كله ممكن يعرضك للرفض.
خلى باللك وانت بتحجز ان مايكونش عامل حجز بمبلغ عشروميت الف جنيه وانت حسابك فى البنك مش قوى .. او مرتبك اللى فى ال HR letter مايسمحلكش بكده .. لازم يكون فى منطقيه فى الاداء زى ما بنقول 😂
كمان خلى باللك انك تراعى تواريخ الحجز فى حاله وجودك خلال الرحله فى اكتر من مدينه او اكتر من بلد شنغن، اكييد هاتحجز اكتر من حجز فندق.
❤️خطاب اتش ار HR letter
ده جواب هاتجيب من اداره الموارد البشريه فى المكان اللى بتشتغل فى مع العلم ان لازم يكون فيه البيانات الاتيه
توجيه الخطاب للسفاره اللى هاتقدم فيها - اسمك بالكامل - تاريخ التعيين - الوظيفه - المرتب الشهرى - اجازه سفرك من تاريخ كام لكام - وان الشغل موافق عليها وانك هاترجع تباشر مهامك مره تانيه - الرقم التامينى لو موجود - مين هايتحمل تكاليف السفر - فى اخر الخطاب ( الشخص المسؤول - وظيفته - اسم الشركه - العنوان - التليفون والايميل - الختم والامضاء )
لو صاحب عمل - هاتجهز السجل التجارى والبطاقه الضريبيه ويكون عدى عليهم سنه.
لو طالب - شهاده القيد من الكليه اللى انت فيها.
لو على المعاش - شهاده من التامينات بمعاشك.
❤️كشف حساب بنكى Bank Statement
ده من اهم الاوراق المطلوبه عشان تاخد الفيزا ودايما بيبقى عندنا أسأله كتيره عنه.
خلينا متفقين ان كل السفارات بتطلبه باختلاف مدته يعنى فى سفارات بتطلب لمده اخر ٦ شهور وفى سفارات تانيه لمده ٣ شهور . على حسب كل سفاره
ليه بيطلبوا المده دى كلها؟ عشان يشوفوا حركات وعمليات السحب والايداع على الحساب وانه مش مجرد حاجه لسه معموله قبل التقديم للفيزا .. يعنى لازم يكون عليها حركه بالارقام رايحه وجايه .. ولو فى اى ارقام بتتحط Bulk خلال الفتره دى غير معتاد عليها لازم يكون عندك رد لان غالبا هاتتسال عليها (حصلت معايا انا شخصيا). طبعا بيقدروا يخدوا فكره عن طريقه صرفك والرقم الحالى فى الحساب وبيقدروا يقيموا الوضع عشان القرار النهائى فى وجود الاوراق التانيه.
❤️تامين طبى Travel Insurance
بيتعمل دلوقتى مع الباسبور من خلال امان - دى الشركه الوحيده دلوقتى اللى بتعمل تامين السفر فى مصر - بيطبع كملصق على الباسبور وبعدين بتطلع على الموقع بتاع المجمعه التامينية وتطبعه وترفقه مع الورق.
❤️صور شخصيه Personal Photos
الصور المطلوبه للشنجن بتبقي صورتين خلفيه بيضاء مقاسها بيختلف حسب السفاره اغلب السفارات بتطلب ان مقاس الصوره يكون 3.5 في 4.5
❤️باسبور سارى وصوره منه Valid Passport
لازم تكون متاكد ان بسبورك سارى لمده ٦ شهور على الاقل ولو كده ياريت تجدده لانه ممكن يعرضك للرفض ويقلل فرصتك للحصول على الفيزا. هاترفق صورته وصور اى اختام او فيز اخدتها قبل كده. ولو عندك باسبور قديم ارفقه بصورته برده
❤️ابليكيشن السفاره Visa Application
ده من اهم الحاجات اللى بتقدمها. دى من الاخر عباره عن المخلص السريع اللى فيه كل البيانات الخاصه بيك، انت مين وجاى ليه وعايز اييه؟ لازم تكتب كل البيانات بدقه شديده وخاصه التواريخ زى ماقلنا وان كل البيانات مطابقه مع الورق اللى انت مقدمه ومع باسبورك. اى معلومه غلط هاتقلل فرصك.
❤️شهاده التحركات
دى شهاده بطلعها من الجوزات فى العباسيه فى حاله عدم سفرك لسنين طويله بره البلد. ودى بتسبت تحركاتك خلال المده دى.
❤️تعهد فى حاله دخول دول معينه قبل الحصول على فيزا شنغن.
دى ورقه بتكون مع الابليكيشن بتسالك عن بعض الدول اذا كنت سافرت ليها قبل كده .. بيبقى مطلوب منك تملا البيانات وتمضيها.
💙💙💙💙💙💙💙💙💙💙💙💙💙💙
برنامج الرحله
من الاحسن انك ترفقه مع الورق عشان ده بيدى انطباع على انك فاهم كويس ومرتب انك رايح تعمل اييه ... يعنى قولى هاتروح تزور ايه من المعالم مثلا وفين وامتى.
تقديم الورق بيبقى من خلال مكاتب السفارات زى TLS او VFS او BLS .طبعا على الدوله اللى انت رايحها بتشوف تبع انهى مكتب. كلهم ليهم مواقع فيها كل التفاصيل والمطلوب. مهم جدا انك ترتب الورق زى كل سفاره ماهى طالبه.
طبعا المواعيد بقيت صعبه ومش زى زمان انك تلاقى ميعاد بسهوله .. عشان كده خطط لرحلتك بدرى وادى نفسك فرصه انك تحجز ميعاد يكون مش قريب قوى من ميعاد رحلتك وعشان كمان تاخد وقتك فى تجهيز الورق!
🧡🧡🧡🧡🧡🧡🧡🧡🧡🧡🧡🧡🧡🧡
طبعا فى الظروف الخاصه وقصص الPCR - دلوقتى وعن تجربه ماحدش بيسال على حاجه .. بس برده ما ينفعش نعمم .. انصحك تدخل على Skyscanner او Booking وتعرف ضوابط كل دوله كتحديثات فى القصه دى .. وكمان اسال خط الطيران اللى انت حاجز عليه رحلتك للتاكيد بس قبل ما تقابلك حاجه فى المطار غير متوقعه.
💚💚💚💚💚💚💚💚💚💚💚💚💚💚
دمتم مسافري❤️
0 التعليقات:
إرسال تعليق