عداد الكهرباء الكارد مسبق الدفع
كل ما اقعد مع حد يشكي من عداد الكهرباء، قلت اعمل بوست اوضح للناس طريقتها، لموضوع طويل شوية بس يستاهل.
العداد الغامض دا بيشتغل ازاي ويحسب الفواتير ازاي
وهل اشاعات الشرايح اللي بتتقال صح ولا غلط ؟!
وازاي اعرف هو شغال مضبوط ولا بيسحب فلوس زيادة ؟؟
وازاي اوفر فلوس واشتغل على اقل شريحة ؟!
أولًا فيه اكتر من نوع من العدادات
منها عدادات جلوبال وفيه عدادات السويدي وهي اللي هتكلم عنها وباقي العدادات نفس الفكرة
العداد طبعا بيشتغل الكترونيا حسب سعر الكيلوات اللي محدداه وزارة الكهربا
شاشة العداد عبارة عن صفحات وانت بتقلب من الزرار الابيض ( اللي يهمنا فيهم ٨ صفحات فقط )
1- اول خطوة عايز تعرف عدادك مضبوط ولا فيه مشكلة
والصفحة دي بتشوف فيها كمية الكهربا اللي شغالة عندك ف الوقت الحالي فلو طفيت كل الاجهزة اللي عندك المفروض الصفحة دي تلاقيها اصفار ( بس ما تطفيهمش من الاتوماتيك )
لو طفيت كل حاجة عندك ولسه الصفحة دي فيها ارقام وبتعد يبقى العداد فيه مشكلة وتراجع شركة الكهربا .
لو طفيت كل حاجة ورحت صفحة (٣٥ ) دي لقيتها اصفار يبقى العداد شغال تمام.
2- ادخل بقى على باقي الصفحات اعرف استهلاكك
صفحة ( ٥ ) بتبينلك انت استهلكت كم كيلو وات الشهر اللي فات.
- - - -
تفاصيل شائح استهلاك الكهرباء
نيجي لموضوع الشرايح، شركة الكهربا حددت ٧ شرايح لاستهلاك الكهربا، وكل شريحة وليها سعر.
دي الاسعار الحالية ولسه هترفع اما ف شهر ١ او شهر ٧
من ٠ الى ٥٠ كيلو وات سعرها ٤٨ قرش
2- الشريحة التانية
من ٥١ وات الى ١٠٠ كيلو وات وسعرها ٥٨ قرش
3- الشريحة الثالثة
من صفر حتى ٢٠٠ كيلو وات سعرها ٧٧ قرش
( هو هنا بيحاسبك ب ٥٨ قرش بعد ال ١٠٠ كيلو وات لكن لو وصل استهلاكك الى ٢٠٠ كيلو وات بيحاسبك ب ٧٧ قرش من اول كيلو وات )
4- الشريحة الرابعة
من ٢٠١ الى ٣٥٠ كيلو وات سعرها ١٠٦ قرش
5- الشريحة الخامسة
من ٣٥١ الى ٦٥٠ كيلو وات وسعرها ١٢٨ قرش
6- الشريحة السادسة
من ٠ الى ١٠٠٠ كيلو وات سعرها ١٢٨ قرش
( هو هنا بيحاسبك ب ١٢٨ قرش من بعد ٦٥٠ كيلو وات
لكن لو وصلت الى ١٠٠٠ كيلو وات هيحاسبك ب ١٢٨ قرش لكل الاستهلاك من اول صفر )
ودي شريحة غير مدعومة للأسف وربنا يكفينا شرها
7- الشريحة السابعة
من ٠ الى ما فوق ١٠٠٠ كيلو وات وسعرها ١٤٥ قرش
( دي نفس فكرة الشرايح اللي فوق وهي شريحة غير مدعومة أيضًا)
- - - -
طبعا فيه خدمة عملاء بتنضاف على كل شريحة
( مش عارف العملاء دول فين وبيعملوا ايه !! 😂)
وهي على الترتيب
١ جنيه
٢ جنيه
٦ جنيه
١١ جنيه
١٥ جنيه
٢٥ جنيه
٤٠ جنيه
- - - - -
كدا كل واحد يقدر يعرف هو استهلك كم كيلو وات ويحسبها بالفلوس.
- - - -
س : طيب ازاي الواحد يوفر في الاستهلاك ؟!
ج : ان يرشد الاستهلاك بتاعه واي جهاز مالوش لازمة يطفيه وما يسيبهوش شغال يستهلك في الكهربا حتى لو كان شاحن موبايل .
ودي الطريقة الوحيدة للتوفير واي إشاعات تانية هري فاضي مالوش لازمة .
س : ازاي بيشتغل العداد ويحسب الشرايح ؟!
ج : اول كل شهر بتنزل الشريحة اوتوماتك للشريحة رقم ١ ويفضل الواحد يستهلك كهربا وكل ما يزيد الاستهلاك تعلى معاه الشريحة لغاية ما توصل لشريحة خراب البيوت الشرايح الغير مدعومة 😭 ويفضل يحاسبك على سعرها لغاية اخر الشهر .
س : لو وصلت الشريحة الرابعة مثلا قبل الشهر ما يخلص
هل ينفع انزل الى الشريحة الاولى اذا قللت الاستهلاك ؟؟
ج : اذا وصلت لشريحة معينة خلال الشهر مستحيل تنزل الى اقل منها وهيفضل يحاسبك بالشريحة اللي انت وصلتلها لغاية اخر الشهر ولكن اذا قللت الاستهلاك مثلا مش هتوصل الشريحة الاعلى منها لكن انك تنزل لشريحة اقل دا مستحيل 😁 . والعداد بينزل للشريحة الاولى في اول كل شهر اوتوماتيك .
س : لما اشحن الكارت هل المفروض اطفئ كل الاجهزة لما احطه ف العداد علشان اشتغل على شريحة اقل ؟!
ج : هو في كل الحالات المفروض توفر في الاستهلاك وتشغل فقط الاجهزة اللي محتاجها علشان ما تعليش الشريحة من اول اسبوع ف الشهر مثلا وبعدين تفضل تتحاسب بسعر شريحة اعلى لاخر الشهر .
س : سخان الكهربا
المفروض اشغله علطول ولا اشغله عند الحاجة فقط علشان اقلل الاستهلاك بتاعه ؟!
ج : لو الدنيا شتاء وبتستخدمه باستمرار كل ساعة ساعتين يبقى الافضل تشغله علطول ولو عايز تطفيه يبقى عند النوم فقط
لكن لو مش بتستخدمه باستمرار وبتستخدمه مثلا مرة واحدة ف اليوم للاستحمام يبقى شغله نص ساعة فقط قبل الاستحمام وتطفيه باقي اليوم ودا افضل.
0 التعليقات:
إرسال تعليق