حدوتة الجبنة التركي، الأختراع اليونانى الذى تم فى الأسكندرية

لماذا سميت الجبنة الرومي بهذا الاسم؟

ليه النوع ده من الجبنة اسمه جبنة تركى في اسكندرية وأسمه فى باقى مصر جبنه رومى وأمتى وجد فى مصر، وايه الحدوتة بتاعته. 

الجبنه إللى كانت بتتصنع فى مصر زمان كانت الجبنة القريش و الجبنة القديمة إللى هى اصلا جبنة قريش بس عليها مرته وفلفل وشوية حجات وبتتخزن لمدة طويلة. 

اما أنواع الجبن الصلبة دى بدأت تدخل مع الخواجات إللى بدأو يجو مصر مع محمد على باشا. 

طريقة عمل الجبن التركي

لما بدأ اليونانين يوصلو أسكندرية كان فيهم صناع أجبان وهما كان عندهم نوع مشهور من الجبن بيتعمل من خليط لبن الماعز ولبن الخروف. 

لكن فى مصر كان المتوافر بكثرة هو لبن الجاموس ولبن البقر. 
فقررو يجربو يعملو الجبنه دى بخليط من لبن البقر ولبن الجاموس فطلعت معاهم نوع جديد من الجبن الصلبة طعمها مختلف عن الجبنة اليونانى. 

ولما كان أكتر الصناع والبائعين من الأتراك المقيمين فى الأسكندرية فأطلق عليها أهل الأسكندرية جبن تركى. 

سبب تسمية الجبن الرومي

لكن لما بدأ أصحاب المصانع اليونانين بتاعة الجبنه دى يروحو بيها القاهرة عشان يبيعوها أطلق عليها أهل القاهرة جبنه رومى لان أهل القاهرة كانو بيطلقو على الأوربين من طليان و يونان لقب روم فأطلقو عليها جبن رومى. 

و الجبن التركى أو الرومى هو أختراع يونانى تم فى الأسكندرية. 

ومش موجود فى أوربا لان مافيش جاموس (مؤخرا بقى فيه فى أيطاليا جاموس بيعملوا من لبنه بافلو موتزاريلا). 

ولأن الجبن التركى خليط من لبن البقر و الجاموس فهو ده إللى بيديها الطعم المميز بتاعها. 

فى أيطاليا عندهم البرمزان البرمجان(من لبن البقر ) إللى هو القرص الكبير إللى شبه الجبنه التركى لكن الطعم مختلف تماما لأنه من لبن البقر الصافى وطبعا كل دولة عندها عدد كبير من أنواع الجبن الصلب إللى من لبن البقر أو الماعز أو الخراف وهو المتوفر أوربيا لكن معندهمش جاموس. 

بس ياسيدى وهى دى حدوتة الجبنة التركى