كيفية تشطيب شقة بأقل التكاليف حتى لو باقات التشطيب تبع شركة كبيرة

اهم حقوقك كعميل واللي ليك واللي عليك لما تدفع نسبة اشراف؟

طبعا اهم نقطة في التعاقد انك تتعاقد مع سجل تجاري وعضو نقابة هندسية مش مع اي شخص يقول انا بشطب ومن حقك تتطلع ع الاوراق دي وتاخد نسخه منها لو مش مرفقه بالعقد. علشان يكون مسؤول ويكون فاهم للشغل وجاد فيه. وتقدر ع الاقل تحاسبه مهنيا كمهندس او قضائيا كشركة.

1- اهم بند ان حضرتك لو عندك مشكلة تنفيذ من احد صنايعيه ادت الى تلف الخامه لسبب غير قهري. ف المهندس مسؤول يوفرها بدون ماياخد منك جنيه. مهما كان تمنها لانه واخد نسبه من الخامه وواخد نسبه من المصنعيه لضمان تنفيذها صح باتقان (الا لو حضرتك سامحت او شاركت حسب تكلفة الخامة).

2- المهندس واخد نسبة من تمن الخامه ونقلها وتشوينها وتخزينها. يعني مسؤول يتابع النقل ويستلم الخامه ويراجعها انها سليمه ومسؤول عن طريقة التشوين الصح والتخزين الصح لحين الاستخدام. وبالتالي لو حصل اي تلفيات بسبب نقص خبرة (سبب غير قهري). هو مسؤول يعالجها بدون مطالبة المالك باي تكلفه.

3- ضمان الاعمال. (طبعا دا غير منطقي لو بتتعامل مع فرد علشان مش هاتقدر تحاسبه) اي شركة محترمة بتديلك ضمان للاعمال ضد سوء التنفيذ او التركيب. بتختلف الفترة لكل بند بس من حقك بالعقد اللي بينكم انك لو حصل ان في مشاكل مثلا بورسلين او سباكة او كهربا او اي بند يظهر فيه مشكلة بسبب التنفيذ (يعني مايكونش بسبب سوء استخدام) ان الشركة تصلح البند دا وترجع الشئ لاصله بدون مقابل مادي منك.

4- الشركة مسؤوله عن اختيارات الخامات وتوضيح الخامه الكويسه وفروق الاختيار وتفضيل خامه عن اخرى ولو الشركة محترمة وملتزمة بتعاقدها شايفه انك بتختار خامه ضعيفه او غير جيدة ومصر عليها من حقها تركبها وتخلي مسؤوليتها عنها. واي تلفيات بسببها تكون على العميل.

5- اختيار العماله والصنايعية. حضرتك دافع اشراف علشان تستلم شغل كويس. غير منطقي تماما انك تجبر الشركة على صنايعي او فئة سعرية منخفضة وتقوله خليه يطلع دهب. الصنايعية في منها فئات كتير. مش اي صنايعي بيعمل نفس الشغل. بند سيراميك مثلا هاتلاقي صنايعيه من اول ٢٠ لغاية ٦٠ج للمقاسات الطبيعيه. 

ماتتوقعش نفس الجودة من كل واحد. كل واحد شايف السعر المناسب للشغل بتاعه يساوي كام. دور المهندس انه يتاكد ان الصنايعي شغال طبقا للتصميم واصول التنفيذ. مش انه يقف يعلم صنايعي يشتغل اذاي حسب متطلباته. يعني حضرتك ماينفعش تقول دا غالي. 

هو جايب الانسب للمواصفه والشغل المطلوب. لو مصر تشغل صنايعي ارخص. مش هاتحاسبة على هدر خامه او تاخير في العمل او اهدار في التكلفة لما توصل في الاخر ان الصنايعي يمشي وييجي غيره لانه مش بيوصل للجودة المطلوبة.

6- الشركات بيكون ليها خصم عند التجار الكبار ذي السلاب ومظلوم والسويدي للكابلات وغيرهم. اطلب دايما انهم هم يشترو الخامه بنفسهم علشان تستفاد من الخصم دا. ومش من حق الشركة انها تاخد الخصم دا في حالة الاشراف بنسبة (البند دا لوحده ممكن يعادل تكلفة نسبة الاشراف في بعض الخامات)

خليني اوضحلك اذاي انت وفرت الـ ١٥٪ اللي اخدهم المهندس اكتر من مره

1- من التشوين والتخزين.

اي تلفيات ممكن تحصل من عامل اوصنايعي بسبب عدم الخبرة عن الخامة دي ممكن يكون مكلف اكتر من نسبة الاشراف. لان مش هتقدر تاخد تمن نقص الخبرة من عامل جاي يوميه ع باب الله

2- المصنعيات.
المهندس فاهم كل فئة في الجودة متوسط تكلفتها في التنفيذ كام. ف مافيش صنايعي هايعلي عليك.
المهندس من اول تنفيذ البند ممكن يلاحظ عدم مصداقية الصنايعي حول كفائته وبالتالي يوفر عليك خامات ووقت وتكلفة فك وتركيب ويستبدل الصنايعي بواحد فاهم اكتر.

3- خصم الخامات.
ذي ماوضحنا خصم الشركة بيوصل ل ١٠٪ و ٢٠٪ واكتر على سعر الخامه. دا يقدر يعادل كفة النسبة في الخامات الغالية.

4- غرامة تاخير او توفير الوقت.
المفروض ان الشركة تعملك جدول زمني وتلتزم بيه لو محصلش ما يؤجله بسبب مادي او طبيعي او معوقات موقع.

بالتالي التاخير عن الوقت اللي انتو متفقين عليه يخسر الشركة من نسبتها وبالتالي انت ضامن اما التزام في المواعيد وتخلص في وقت متفق عليه. او ع اقل تقدير تعويض مادي لو اتاخرت. ودا مش هاتقدر تاخده من افراد او لو اشتغلت مباشر مع صنايعي

5- ضمان العمل وارجاع الشئ لاصله.
انت اولا بتضمن بدا جودة التنفيذ ولو حصل انه التنفيذ مش حسب المتفق عليه واكتشفت دا متاخر. انت ضامن فلوسك اللي دفعتها في تكلفة البند دا والشركة تنفذه كامل على حسابها

6- راحة البال.
دي لوحدها خدمة بيتدفع فيها فلوس. انت مش محتاج تروح وتنزل وتتابع شغل ولا انك تجري ورا صنايعي مجاش ولا مهندس مالتزمش. انت عندك عقد ملتزم بيه الطرفين. اتاخرو انت هتاخد تعويض التزمو هتاخد شغلك في وقته. يعني كسبان في كل الحالات. 

طبعا كل دا مش هتقدر تاخده لما كعميل تتعامل مع الفئات التالية:

1- صنايعي

2- مهندس بدون شركة

3- شركة بدون مهندس
4- اي شركة بدون عقد واضح الحقوق والالتزامات. 

في الاخر لو وصلت لهنا ف انت مهتم بالموضوع ويهمني اعرف رايك في الكومنتات سواء مؤيد او معارض.